當年今日
關於我們

【香港加息】租客李生:就算唔加息 都覺樓價會跌

蘋果日報 2018/09/27 19:47

加息街訪

多間銀行陸續加息,租緊太古城的市民李先生坦言,希望樓價有下調空間啦!就算唔加息,都覺得樓價會跌,因為樓價過高。好似股市咁,去到一個頂,自然要落返來。
雖然加息會令樓價調整,但李生認為下跌幅度唔大,因為炒高樓價啲人基本唔係驚加息既人,真正用家先至驚加息。而家講緊千幾萬一層樓,用家用得起咩?月薪無十幾萬都供唔起,香港有幾多巴仙市民月薪十幾萬呀!所以覺得買個啲唔係用家,而係炒家。
目前本港是否加息周期開展,他回應,唔識唔夠膽講,但應該會陸續加息,去年前年都無加,而今年特朗普一定會搞嘢,美國經濟好,自然要加息,以免出現通脹。對於是否不停加息,他覺得會,並謂希望會,啲人心態上覺得樓減價。如果樓價跌,今年無可能,因為太多外圍因素,但覺得樓價一定會跌,話唔定幾時,希望出年跌10%。
李生是重建戶,3年前單位被收購,奈何換不到相近面積單位,亦沒有入市,他認為,天時地利人和,無得怨,就算樓價跌一成,個價都返唔到個陣。樓價跌,會考慮入市,但唔一定買私樓,睇埋政府啲政策,例如抽居屋。如果政府一路排山倒海推居屋,又半價既,仔女第日絕對買得起啦。難抽?你話今年出年要抽到,無可能啦。但仔女講緊十年後,無所謂啦。如果政府持續推售居屋,覺得每一個香港市民都會等到既。
記者 陳家雄