馬浚偉前年首次自編自導自演舞台劇《偶然．徐志摩》，呢個劇本係佢親手一筆一字創作出嚟，佢日前接受《蘋果》專訪時話：「我唔識用輸入法，每隻字自己寫出嚟，寫到手抽筋，四萬字花咗7個月，所以呢個故仔係『七星仔』。」馬仔特別痛錫呢個「七星仔」，佢今年6月底再度重演12場，女主角陸小曼由萬綺雯換上視后胡定欣。

馬仔同定欣於11年合作無綫劇集《當旺爸爸》，去年再喺劇集《宮心計2深宮計》碰頭，馬仔獲悉定欣有意挑戰舞台劇，兩人一拍即合。馬仔話：「定欣勤力認真，佢好希望進步，佢識跳中國舞，又唱得。」馬仔知道定欣係「舞」林高手，索性加佢戲份：「劇本有一場讀白，我索性改咗畀定欣一個人兩分鐘solo，齋跳水袖舞，甚至做『龍蝦躍跳』，以表達陸小曼內心寂寞、無奈同討厭被困屋內，渴望自由。」　

馬仔過去兩年香港內地演過12場《偶然．徐志摩》，再演當然熟能生巧，不過但佢仍然求變，角色方面會加深層次，「經驗多咗仲想捽靚劇本，內容係關於徐志摩三段愛情故事，唔會heavy，仲有笑位。我演徐志摩仲想咬入深啲層次，將佢內心嘅澎湃嘭嘭聲放大，將文青內裏嘅獅子釋放出嚟，我仲會首次喺演藝舞台踩單車。」至於其他舞台效果，馬仔都落重本：「全新舞台設計，會用全新電腦燈，製作費近400萬。」

「做舞台劇能break even（收支平衡）已好開心，我唔會為賺錢，嚟參與工作人員都係，我哋唔會出好高價錢，我哋出去做場商演都喺晒度，使鬼排成個月咩。做舞台心態，唔會用錢掛鈎釣，係滿足感同鍛練，可以睇到台下觀眾即時反應，冇得呃，反而拍電視劇可以用機器幫手，當情緒做唔足夠，可以畀個close up，畀mood music，幫營造情感出嚟，但舞台就唔得。所以做舞台劇等同『考牌』，我仲有排學，我又會睇番觀眾喺社交平台嘅劇評，讚彈全收。」

馬仔話演員每晚表現都會唔同，即使佢有經驗都試過入唔到戲，基督徒嘅佢自爆：「我有試過一、兩日入唔到戲，舞台一出虎度門冇上到，嗰次內地演出，唔知點解總係投入唔到，好彩中場休息後先入番戲。我於是幫自己搵咗一個方法，迫自己徐志摩上身，每晚後台stand by時，我都會講『希望今日由頭上身上到尾』。」馬仔除靠熟練綵排，佢話那副金框眼鏡都幫助唔少，好似「靈物」一樣，佢會排戲排到最後一周先戴上，「我一戴咗，任何人講嘢都聽唔到，自己只進入徐志摩世界，真係work。」

劇情會交待徐志摩被陸小曼掌摑到飛甩眼鏡，馬仔話：「預咗有六副眼鏡旁身，之前蚊蚊（萬綺雯）演時，打到我成副眼鏡飛落台上觀眾席第一行，本來悲傷場口，變咗笑點。自此我就同對手停研究，到底車我一嗰巴，角度點車，我叫佢哋可以用手指插入框度，順勢打時勾出嚟，眼鏡框向地下跌，唔係向天飛出去。」馬仔話今次要同定欣好好夾吓點打呢一巴，至緊要打到飛甩眼鏡。

由於馬仔身兼多職，所以佢對大家要求都嚴格，希望每位演員都將對白背得滾瓜爛熟，馬仔話試過遇上對手講錯對白：「佢賴勁，兼顧唔到咁多，我嗰時心中有一堆英文字出嚟。」遇上呢啲「蝦碌」，馬仔話點都要繼續，舞台劇唔容許有NG。