三大高手各有各好，不過單講呢日第七場揀馬，雷神就可謂挑通眼眉。賽前佢幫過「貝利奇」贏泥地試閘，此駒季初一戰1200米即勝，保持季內同程不敗，最終雷神卻接手自己從未騎過、在港未上過名兼未跑過1200米之「太陽驕子」。結果證明雷神即係雷神，「太陽驕子」留到最後百幾米，發揮凌厲追勁趕過韋達之「靚猴王」，順利幫呢匹落飛馬取得來港首捷，而佢自己亦憑「牛精叻仔」、「勁勢」、「太陽驕子」贏到今日第三W。
「太陽驕子」早前由賀廐轉投呂廐，賀賢今場原本想用「貝利奇」誅叛將，最終畀一個雷神破壞晒全盤計劃，「貝利奇」只跑第三。呂健威透露，馬兒上仗跑完後，馬主鄒達江表示希望愛駒由雷神策騎，而雷神向呂健威建議，「太陽驕子」末段衝刺力較弱，宜縮程跑1200米，威哥從善如流，接納雷神的分析。威哥又指「太陽驕子」很稚嫩，故此賽前安排密集式的操練，以作教馬，令馬兒有所進步，也是贏馬關鍵。而著名經理人、太陽娛樂文化高層Paco黃栢高，特意入場支持老友鄒達江，結果佢做咗運財童子，「太陽驕子」表現即脫胎換骨，一齊拉頭馬，皆大歡喜。