慘遭病魔打低嘅「好打得」發展局林鄭局長休養後復出，噚日帶隊同議員暢遊維港兩岸，巡視多區海濱長廊發展情況。林鄭局長唔係第一次帶議員遊花園，以前曾經舉辦船河團在維港睇海岸發展，今次變成陸上遊，同議員先後到觀塘、鰂魚涌等地，因為呢啲區都有海濱長廊，政府承諾將「還港於民」，喺各區設置地區海濱公園，所以林鄭同議員去巡視。
公民黨陳淑莊可能平日多喺中環出入，去到觀塘巧明街、駿業街附近，觀塘繞道下面個海濱長廊參觀時心情勁興奮，話意想唔到工廠林立嘅觀塘區有咁好環境地方，碧海藍天令人心曠神怡，八方見佢開心到紮紮跳㖭。

位置就腳兼水質不俗

議員官員巡視之際，陳淑莊忽然企近岸邊，八方擔心佢叉錯腳跳落海就弊，點知佢話呢度果然係跳海好地方。陳淑莊何事自尋短見呀？佢話唔係想死，而係覺得呢個海濱長廊位置適中就腳，海面又似乎唔係太多垃圾，水質看來不俗，日後民主派要玩跳海抗議，大可選擇在此一躍跳落維港。
年前韓農來港示威，曾經喺灣仔跳海抗議，開創示威新方式，之後民主派有樣學樣，都試過跳海爭取普選，因此陳淑莊嚟到觀塘海濱長廊，諗到跳海都好正常，況且維港填海越來越多，家陣想喺中環、灣仔搵地方跳海都唔容易，轉移陣地到觀塘亦十分合理。

建議開放柱躉供塗鴉

海濱公園變成跳海勝地，林鄭可能都始料不及。陳淑莊睇完海濱長廊，認為爭啲嘢，建議政府聯繫一啲青年組織，容許後生仔喺長廊入面嘅觀塘繞道柱躉塗鴉，一來美化環境，亦多啲人氣咁話。觀塘海濱長廊第一期年底開放，官員提供嘅圖片亦十分精美，竟然有好多帆船喺長廊外維港航行，又話由牛頭角港鐵站行去僅三分鐘，八方相信要100米短跑速度先得，呢啲資料，真實程度媲美地產商售樓書。
mailto:[email protected]