2017年以777票當選特首的林鄭月娥，竟然一如敗選對手曾俊華所言，強推《逃犯條例》修訂而成為「撕裂社會2.0」，不少原期望林鄭將帶香港由梁振英時代重回正軌的人大失所望。《蘋果》綜合7位人士眼中的777，發現林鄭最大問題是一意孤行，拒聽意見，政治上民主派對她由觀望到絕望，建制派則由懷疑到炮轟，盟友不見了，民望蒸發了，會按主流民意要求辭職的選舉承諾，在5年任期任期收尾兩年，當然消失了。

醫學界：香港醫學會會董佘達明

「上年6月19號我已經喺Facebook寫咗要求林鄭落台，依家都係。佢目中無人，連醫生都睇唔起；中美矛盾就好似火警響警鐘，佢唔識救火，仲火上加油，推《逃犯條例》搞到社會撕裂，後生仔俾人打又唔去探，連做阿媽都唔識。」

社福界：社會工作者總工會外務副會長張志偉

「過去3年，佢（林鄭）成個精力只係搞政治，社福完全唔及格。扶貧明顯不力，堅尼系數持續高企，社福規劃亦沒承擔，服務零散。對於弱勢更不顧，長者宿舍或SEN（特殊教育需要）學童培訓要輪候好長時間，仲要收緊長者綜援資格，係相當乞人憎嘅做法。佢只係一個執行機器，根本無人文關懷。如果佢連任，真係好擔心。」

商界：蘭桂坊集團主席盛智文

「Carrie上任以來最大錯誤是推《逃犯條例》，坐在辦公室做決策，未有聆聽街上人民聲音。條例最後壽終正寢，但香港名聲已受損，加上受疫情影響（雖然防疫做得好），經濟差營商難，幸而政府出錢救市才有起息。Carrie與中央關係好，和年輕人卻有代溝，希望餘下任期主力解決住屋問題，令市民安居樂業，由民生緩解政治紛爭。」

勞工界：公務員工會聯合會總幹事梁籌庭

「作為最高領導人，民生係最緊要，民生搞得唔好、怨聲載道，佢喺呢方面失分比較多，又唔係好信任我哋，公務員都係打工仔，好明顯呢次薪酬事件係最hurt公務員嘅心，因為近年社會運動、疫情，所有夥計都搏晒命去做，但冇回報。公務員喺呢任特首領導下，俾人鬧機會大過以往任何一任特首，依家公務員士氣，可以話係咁多任特首中最低落。」

教育界：中學校長會主席鄧振強

「同前幾任特首比較，林太好肯投放資源喺教育，如果淨係睇錢，我會畀佢及格。但奈何政治事件令佢同教育界停止咗溝通，感覺上有人將社運責任歸咎於教育界；希望林太以開放胸襟、同理心去聆聽各方意見，一啲有爭議性嘅政策，其實學校可以運用專業妥善處理，關鍵係要有信任，政策要預留空間同彈性，未來兩年點樣令年輕人、家長對教育有番信心係最重要。」

會計界：立法會議員梁繼昌

「佢嘅風格或者施政嘅作風有冇改變？其實我唔覺得有任何改變，佢從開始以嚟，都係一個比較強悍嘅執行者，只不過由以往自稱為港人服務，轉為向中央服務的特首……最近呢幾個月，佢似乎淨係執行緊中央嘅指令，冇顧到香港大部份人嘅諗法或者感受，喺『港版國安法』明顯地選擇性接收意見，配合中央工作。」

政界：監警會前委員鄭承隆

「可以睇得出，其實佢（林鄭）上任之初喺施政方面係有啲無所適從，但經過呢三年，佢開始慢慢掌握到施政嘅方向，但係佢身邊只係得一班建制派同問責班子收集民意，仲要離地離得幾緊要，先至造成而家咁嘅局面。」

-----------------------------
蘋果25年系列ebook《讀果》上架：紀實現場 、世界前線 、逆權之路 、叱吒風雲 、守護真相
-----------------------------
反送中一周年，《蘋果》整理大量涉及警察濫暴濫權等資料，製成詳盡資料庫，請按此閱讀圖表版本 ／純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多