【讀者爆料】堅稱狄以達唔係第三者 陳曉華:唔驚會有人再爆料
港姐冠軍香港小姐2018狄以達陳曉華
一年一度嘅香港小姐已經出爐,所有獎項都已經名花有主,今年嘅港姐冠軍係17號陳曉華(Hera),講到Hera,令大家最為人所識嘅,除咗係佢173CM嘅身高之外,當然仲係佢曾經同狄以達拍拖,喺舊年8月有《蘋果》讀者見到佢哋喺牛頭角撐枱腳嘆平民壽司,傾到興起嘅時候,Hera爆粗講「X樣」(新聞連結: https://bit.ly/2PRyrbs )
雖然狄以達欣賞女友真性情,但係呢段戀情都係keep咗1年左右,喺今年4月分手狄以達同Hera分手,跟住Hera走咗去選港姐,結果一夜成名!正所謂人怕出名豬怕肥,做咗港姐冠軍,Hera接二連三被翻舊帳,日前《蘋果》收到讀者報料,提到當年Hera喺中大讀nursing嘅生活。
讀者話:「我哋o依家冇乜聯絡,嗰陣Hera喺讀同一個同學一齊咗好耐,大嘅都有兩三年左右,嗰個男仔讀書好叻,係Dean's list(院長嘉許名單),但係最後都分咗手,聽講係因為狄以達,但係唔清楚係咪三角戀,只係兩個男朋友時間好緊接。」讀者仲話:「嗰陣狄以達個陣會接Hera放學,去到實習嘅時候,都有接送。」
唔知讀書嗰陣Hera又有冇講過話去選美呢?讀者就話:「咁又冇喎,不過佢係咁話減肥,明明已經好瘦!」
Hera今日喺佐敦出席活動,講到有讀者報料當日狄以達疑似係小三,佢話:「唔係,我唔知嗰位爆料嘅人,係咪真係我同學,兩段感情都相隔咗一段時間,唔係非常緊接。」佢仲話:「我唔驚會有人再爆料,清楚我嘅人都知大部分時間都係讀書同實習,係一個認真讀書嘅人。」Hera亦話狄以達已經恭喜咗佢。
精選娛聞,喺晒《娛果》
http://fb.com/appledailyent