15名民主派議員將接受延任與否問題交由民調結果決定。民主黨主席胡志偉形容，此舉是不想民主派陣營因去留問題而「你死我活、敵我矛盾」，又提議日後建立機制，例如透過民調解決爭議。而無論去留民調的結果如何，他亦有心理準備會被責難，強調自己「問心無愧」。

主張留任的胡志偉接受香港電台專訪時稱，去留問題「純粹係一個策略上嘅分歧」，「凡係戰術上有唔同睇法嘅時候，大家盡量求同存異啦！」他重申，議會戰線是「總係一個武器」，若放棄這條戰線，政府和建制派便可「光速」、甚至無聲無息下通過惡法或撥款，而民主派留任，至少可起拖延作用。

民主派就去留問題爭論得臉紅耳熱，胡表示「我又唔會喺呢一度講，我哋唔可以齊上齊落」，「就算真係做唔到完完全全齊上齊落都好，但係個過程本身已經令到大家係理解到去留嘅理據嘅時候，大家唔會將一件事變成一個原則性嘅分歧，咁其實已經解決咗好大部份嘅矛盾。」

民主黨與公民黨、香港本土毛孟靜、工黨張超雄和社福界議員邵家臻決定以民調定去留。胡解釋此舉是想解結，「（去留爭議）變成喺陣營裡面嘅你死我活、敵我矛盾嘅話，呢一個係唔會對成個抗爭運動有正面嘅意義，所以我哋想解開呢個結。」

他更建議，日後民主派可建立以民調解決爭議的機制，「大家將啲好有爭議嘅嘢，放喺一個民意調查嘅計劃裡面，可能係唔同嘅陣營，可以透過辯論、透過交流意見，搵到起碼係民主派嘅支持者點樣睇一件事嘅一個方向。」

他認為這做法可避免民主派陣營被中共分化、挑起矛盾，「我哋大家用呢一種方法去求同存異，呢個係一個重要嘅過程去解開咁耐以嚟，傳統民主派同本土派之間嘅矛盾。」

無論去留民調結果如何，胡亦有心理準備會被責難，「我哋都只能夠接受喇，始終一個自由社會，我諗喺個過程裡面，我哋係問心無愧去做呢一件事。」

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！