國際小姐澳門代表麥嘉欣（Sofia）今日喺奧海城出席XBOX活動，吸引唔少男粉絲到場，而Sofia媽媽亦有現身，不過未有同囡囡合照。

Sofia喺席上即場試玩賽車遊戲，見佢開得好快，佢事後表示：「我有車牌，平時唔會開快車，想開快啲都唔得，因為澳門成日塞車。」Sofia指爸爸同男友都會打機，不過唔會好沉迷。問佢想唔想參加賽車比賽？佢話：「我只係一年車牌，實戰經驗唔係咁犀利，因為落場要有好好嘅訓練。」

講到佢喺11月去日本參加國際小姐，Sofia指現時要練習catwalk、化妝同整頭，仲要做運動keep fit，盡量少食澱粉質，問佢現時幾多磅？佢即刻話唔想透露：「係未達標，但又冇話要減幾多，因為我想肌肉結實啲，想有馬甲線，朝早唔食嘢都有少少馬甲線，所以要再努力。」此外，提到早前颱風天鴿吹襲澳門，Sofia透露好多地方已回復正常，但仍有停車場仲係維修中。