強國人嘅玻璃心，搞到美帝快餐嘅「肯德基」同「老麥」唔食得，菲律賓香蕉又話唔食得。但原來玻璃心唔只強國人有，曾經備受球迷愛戴嘅巴塞隆拿名宿佩奧爾，就因為喺一段宣傳片度講咗句「我係西班牙人」，結果喺網上畀加泰隆尼亞人聲討。

佩奧爾喺幫一個中國電視頻道宣傳嘅片段度係咁樣介紹自己嘅︰「我係前巴塞隆拿隊長、我贏過六次聯賽、三次歐聯、一次世界盃同埋一次歐國盃冠軍，我係佩奧爾，我係一個西班牙人。」雖然呢個片段喺千里之外播映，但係喺西班牙、特別係加泰隆尼亞人就好大反應，因為佢一句「我係西班牙人」而喺佢嘅Twitter留低咗數以千計批評佢嘅留言。

其實佩奧爾係喺加泰隆尼亞地區出世，亦一直只係效力屬於呢個地區嘅球隊巴塞隆拿，雖然冇正式表過態支持加泰獨立，但都支持過加泰嘅獨立旗幟事件，所以加泰隆拿尼亞人咪好似強國人咁都會玻璃心，狠批佩奧爾係叛徒，其中有人就球迷話「一個人可以離婚、改變自己配偶，但唔能夠改變自己支持嘅球隊、自己嘅祖國同旗幟」。喺2000至2013年曾經代表西班牙國家隊出賽100場嘅佩奧爾今次都可以話係無妄之災，唔知佢最後使唔使拍片道歉嚟平息事件呢？