股市舊年開始升到𠵱家，淨係買新股，上市即日放都賺唔少，吸引唔少仲讀緊書嘅後生仔問阿媽借股票戶口炒股。天使多情話：「識得有個後生仔，有份工好哋哋唔做，話去讀書，其實只係貪可以問政府借學生貸款。借咗十幾萬之後，分期交學費，得閒返吓學，剩低嗰啲就用嚟炒股，真係好過打工！」

輸錢機會大過師奶

阿牛2話：「後生仔炒股輸錢機會仲大過啲師奶，因為佢哋缺乏經驗，同埋視野不足，一個大浪冚埋嚟死嘅居多。15、16歲嘅𡃁仔唔好咁快學人炒股，好好讀書同考試，上到大學至炒股都未遲。」
等別週話：「啲師奶論實戰經驗好過讀緊書嘅後生仔，不過後生仔有度好，就係諗嘢快啲，會反省失敗，就算炒錯股都好快糾正。」Santoluk就話：「最怕班後生仔唔識死，走去炒輪，低估咗市場風險同輪商嘅招數，最後輸錢離場。」小魔童就認為：「後生仔本錢唔多，炒股投機多過投資，唔會點講乜嘢分析，諗住博一博，輸咗咪讀書囉。」
http://www.inv168.com/phpBB2/viewtopic.php?t=39728