黃翊日前喺電台節目透露，太太陳存正嘅腎病復發，情況唔係咁理想（新聞連結： http://bit.ly/2BSH9lE )。今日黃翊接受《蘋果》訪問，講到太太嘅情況，黃翊話：「佢有呢個病都好多年，嗰陣一日要食好多粒藥，真係擔心佢食藥食到唔落飯，當時都有問過醫生有冇需要換腎，佢話未睇到有呢個需要，暫時可以接受治療就得，所以都放低咗心頭大石。」

黃翊話當時有朋友提議叫他們睇中醫，始終西藥啲藥性好猛，加上又夾到一個醫師，佢話：「調理完之後情況好好，外表回復以前一樣咁靚，但係o依家諗番，其實我哋有啲嘢疏忽咗，冇keep住抽血做檢查，知道情況，到出咗問題已經太遲。」

黃翊話其實太太一直好忍得痛，點知有一日突然話要入院：「我聽完好擔心，檢查之後發現個腎病復發，有啲組織已經壞死咗，有啲組織想死，有啲組織係麻麻地活躍，成個狀況都係唔好。我哋喺私家都睇咗好多年醫生，上次住10日，都用咗20萬，雖然有買保險，但係人出雞，我出豉油都點死我喇。」講到呢度，黃翊苦笑 :「雖然我係黃老闆，但係唔係上市公司嘅老闆，只係普通大牌檔，真係好大壓力。」喺呢個時候有朋友提議他們不如去睇公立醫生，於是去瑪麗醫院。

「嗰陣情況好差，太太身體嘅毒素去到900，一個正常人只係90左右，太太好驚，因為唔係話可以隨時去探病，要跟番個時間，太太對眼又俾啲毒素影響，好似有灘水喺前面，睇晒蒙查查，好驚會好唔番，嗰刻真係好徬徨。好彩遇到嗰個病友，佢好了解醫院嘅運作，好細心同太太解釋，太太放鬆咗好多。」

更多娛聞，喺晒《娛果》
http://fb.com/appledailyent