一年一度的國際騎師錦標賽於周三（5日）晚舉行，雖然參賽者都是一等一高手，但熟悉快活谷場地的始終可以秤先多少，如果手執好座騎，贏馬呼聲就會更高。

蘇兆輝近期手風順，有力在今次騎師賽延續旺勢，於第三關第七場四班1650米抽到實力灰馬「快利寶」出戰，在正常發揮下當可再下一城。

「快利寶」上季由短途起步，初時表現平平，加上愛爾蘭馬普遍較為遲熟，到上季尾轉跑中距離始見真章，於43分輕勝一場谷草1650米。

踏入今季後，高伯新集中安排「快利寶」續跑贏馬途程，奈何陣上際遇一再欠理想，連續兩場在慢步速的形勢下只能追近，該兩仗克服很大難度追回大量失地，單睇賽續已值得尊重，果然到上仗步速正常及有好檔之助，即以輕鬆姿態贏馬。

這匹北半球馬到1月才轉五歲，大熟之馬兩勝1650米後仍居四班，可以話係仍有分在手。

今場不乏前領馬，「紫電明珠」及「埼豐」等料會締造正常步速，有助「快利寶」發揮，雖然同場有多駒贏過同程，但唔少都似是而非，論上升空間肯定不及「快利寶」。

蘇兆輝殺得性起，鬥起後勁上來氣勢十足，加上大賽當前勢必出盡九牛二虎之力，人強馬壯可順利掄元。