早前內地導演宋祖德嚟香港宣傳將開拍嘅電影《楊德財征婚》，當日佢發咗個新聞稿，內容踩張藝謀套《千里走單騎》同陳凱歌齣《無極》，話呢兩套戲都會慘敗，而佢套《楊德財征婚》就好到極，新聞稿最後一段，重話套戲係以章子怡、李冰冰、趙薇同周迅幾位內地女星嘅戀愛真實故事改編嘅。
噚日有位自稱係章子怡助理嘅Celine傳真嚟報館，話十一月四號上午已經搵咗律師研究，準備以侵犯名譽權為由，喺香港同內地嘅法院都提出起訴告宋祖德。Celine重話宋祖德之前出過本新書，內容猛烈抨擊章子怡，加上今次部戲又攞章子怡嘅戀情做焦點，令章子怡好嬲喎。

自稱講真話

而宋祖德噚日喺電話聽到呢件事，就話之前有個自稱章子怡嘅助手都有打電話去佢公司，對方向佢秘書話要警告佢喺新聞言論上要注意吓，唔可以再誹謗章子怡。宋祖德話：「我沒有刻意誹謗她，我講的寫的全是事實，講真話都會被起訴，那太可笑了。」
宋祖德話佢部新戲內容涉及其他女星，事前冇知會人哋，佢話：「事情我會交給律師處理，我戲還沒上，她就給我做這負面新聞，那麼不負責任，如果對我電影有甚麼損害，我會告她們要她們賠錢。」