曼聯小將連格上輪英超大顯神威，後備落場連入兩球助球隊主場逼和般尼，被視為紅魔中場嘅新希望。但連格嘅私生活就有啲唔檢點，英國《太陽報》就大爆連格背住女友偷食，對象重要係一個32歲、育有一子嘅單親母親利奧妮（Leonie Borek）。

25歲嘅連格本身有女友，佢就係來自美國嘅24歲model珍娜（Jena Frumes）。而事件嘅主角利奧尼就係曼聯粉絲，佢話係連格主動結識自己，之後兩個就開始互傳短訊。利奧妮重話連格好性急，經常邀請佢去屋企、酒店約會「談心」。

早喺月初曼聯作客阿仙奴嘅大戰，當時住喺倫敦酒店嘅連格已經邀請利奧妮上房，但利奧妮拒絕咗。利奧妮話：「佢（連格）應該專注喺場波上面，而唔係掛住做愛，因為佢收咗人工嫁！」

到本月11號嘅曼市打吡戰前夕，連格又再約利奧妮上房，而利奧妮最尾都應承咗。喺打吡戰完咗之後，連格就同利奧妮翻雲覆雨，名副其實一晚開雙工。然後第二朝連格嫌唔夠喉再嚟，廿四小時內就同利奧妮開心咗三次。開心完之後，連格送咗對簽名球靴畀利奧妮，當做係紀念品咁話。

連格之後若無其事，重同女友珍娜慶祝自已嘅25歲生日，搞到利奧妮好唔開心。利奧妮同《太陽報》話:「點解有個靚女友重要出嚟偷食，好明顯佢完全唔覺得羞恥!」