三T頭兩關四、五場爆到七彩，未跑尾關第六場，已經知過關纜斷晒落次關第五場，即係三T中頭關第四場已經有安慰獎收。
不過尾關第六場三班1400米卻嚟個大反底，唔再爆之餘，ＱＴ更加熱到辣手，1.6倍全熱門「包裝奔馳」夥拍雷神後上取得連捷，人馬保持合作兩次不敗，呢匹姚廐四歲新貴，第一季出賽六戰三冠兩亞，表現好標青，大超班馬果然是大超班馬。賽後馬主家族的李文斌穿七彩西裝拉頭馬，搶晒愛駒風頭。
今場與「包裝奔馳」串5.4倍Q嘅係梁家俊座騎「歡樂小子」，呢匹文廐馬連續兩場第三後，今鋪有進步跑第二，不過就仲未可以攻陷三班。三、四名係澳洲騎師天下，分別係布文座騎71倍大冷「慣勝福星」及由柏寶操刀之22倍冷門「共創輝煌」，但四重彩只派一萬六千幾。
至於臨場有巨額過關之「海都巨星」搭「共創輝煌」連贏付諸流水，兩駒同樣輸到位置都冇。今日三T安慰獎因為頭關第四場開平頭第三，所以有兩瓣派彩。
「包裝奔馳」馬主李運強只坐在會員棚看台，未有到凱旋門，兒子李文斌說：「當我看到『包裝奔馳』早段在內欄時，我超級緊張，擔心馬兒會塞死，幸而順利找到空位衝上前。此馬今仗負129磅排外檔，難度甚高，仍可克服困難勝出，表現令我們很滿意。」