民建聯創黨主席曾鈺成唔肯回應佢係咪共產黨員，正如長毛所講等如「默認」。阿曾噚日喺商台節目解釋，民建聯創黨以嚟，一直都有人問佢呢個問題，但自己從未回應過，唔係敢唔敢認嘅問題，佢只係覺得香港人對共產黨嘅概念好負面，仲舉例話唔少人鍾意用有貶義嘅「土共」嚟形容香港左派就知，但佢個人唔太接受呢種負面標籤。

「共產黨有乜失禮你」

但烽煙嘅聽眾就唔多接受阿曾嘅解釋，市民周先生直斥：「乜共產黨個名好衰咩？既然你話香港人接受咗你哋係親中，點解到𠵱家都唔肯認（共產黨員身份）？」洪先生亦大大聲聲問佢：「係唔係共產黨員有乜咁大問題？共產黨有乜嘢咁失禮你？」佢覺得阿曾唔應該言詞閃爍，顧左右而言他。
阿曾回應時梗係話共產黨唔係衰，只係重申社會對共產黨員依然未夠公道，仲反問家陣係咪要所有擔任公職嘅人，都要申報共產黨或者國民黨員身份。
阿曾嘅對手肥仔明噚日喺節目中一直坐冷板凳，直到最後先發市，可惜聽眾黎小姐係不滿肥仔明陪跑，美化咗曾鈺成；被泛民推薦嘅肥仔明除咗苦笑，仲可以點？