韓國Hip hop男歌手San E早前惹上是非，事源日前首爾某酒吧發生三男兩女互毆事件，事後San E於Instagram公開事件現場嘅影片，當中見到女性跟男性喺酒吧內互相辱罵。雖然San E嘅片段已經有打格，不過網民就炮轟San E咁做係對一眾受害者進行第二次傷害，又指San E上載嘅影像係非法拍攝（相關新聞連結： https://bit.ly/2Dp0vio） 。

而之後San E又推出新歌《FEMINIST》，歌詞中提到「我不明白為甚麼女人和男人此刻並不平等」、「Blame system not men（責備制度而不是（責備）男人」等，亦有提到韓國嘅「#MeToo運動」，再次惹來爭議。

而噚日San E就喺「BRAND NEW YEAR 2018」演出上再次陷入爭議，佢喺現場問觀眾：「大家討唔討厭我？」台下有觀眾就回答：「是的。」而San E就繼續指自己會用愛來對待大家，此時就有一名觀眾將一隻寫有誹謗字眼嘅豬公仔擲上舞台，San E見狀即反問台下觀眾：「呢度有極端嘅女權主義群組嘅人？」之後再用英文講咗粗口，然後再表示呢啲人係「社會嘅毒瘤」。台下觀眾反應好激動，並紛紛起哄要求佢道歉，最終San E未能順利完成演出，只進行約3分鐘就被迫中斷。事後活動方面就向觀眾道歉，表示：「喺公演中如果觀眾嘅心情受到傷害，借此向大家道歉。」

今早San E就於Twitter公開噚晚演出時嘅影片，片中見到台下有人舉印有侮辱San E字句嘅橫額，而離開會場時，San E就向粉絲鞠躬，表示下次再唱歌畀大家聽，以及感謝粉絲支持。

精選韓流，喺晒《娛果》
http://fb.com/appledailyent