今日8場西甲聯秩序，除咗主場迎戰馬德里體育會嘅利雲特，以及迎戰巴塞隆拿嘅馬略卡，其餘6支主隊都要讓波。預料下盤當道，又或者話今日西甲聯，應屬客隊天下。
畢爾包最近客場出賽真係好路數，自從喺升班馬塔拉戈納地頭，打開今季勝門之後，又加上主場踢極踢唔出水準，於是一直捉住畢爾包客場秩序出擊，迄今3場客戰全部喺受讓之下同對手打和1:1，果然有辦法；今日又作客，睇主隊愛斯賓奴現時境況，真係無乜穩贏條件，畢爾包又受讓平/半，呢條好路一於追到斷為止。

皇蘇弱勢竟要讓平/半

另一場弱勢主隊讓波場合，皇家蘇斯達近期換咗教練，輸多場之後出現一般西甲聯有新帥登場嘅小陽春走勢，近兩仗得勝和各一，但贏波場合係西班牙盃，聯賽就仍然未開到勝門。今日夠膽死又讓住班波本身有啲質素嘅貝廸斯平/半嚟踢，呢場下盤似執半個，和波機會不俗。
其他客隊，包括逐漸適應傷兵問題嘅馬體會，以及正呈勇勢嘅基達菲，前者只係面對實力平平升班馬利雲特，基達菲就喺新敗嘅維拉利爾身上得到受讓半球之利，俱有考慮作過關配腳條件。
尾場拉科魯尼亞主場鬥切爾達，係當地有名嘅具競爭性戲碼，兩軍敵對程度儼如一般同市打吡戰；呢幾日未埋牙，雙方職球員甚至球迷，已經爆發連串挑釁言論，呢類場合，經驗話畀華度知，亦可以小試下盤。文：華度