地舖劈價，要客人搭𨋢先幫襯到的樓上舖自然更加慘情。樓上舖爆煲，去年已露端倪，銅鑼灣最先爆，包括羅素街8號、Oliv均錄蝕讓血案，情況已蔓延九龍。
繼旺角樓上舖金鑽璽醞釀蝕讓潮後，同區宏安發展2013年開賣樓花的旺角彌敦道726號，再錄撻定貨重售賤賣。該廈入伙近兩年，本月中八樓全層，面積約2,200方呎，以4,600萬元易手，呎價2.09萬元。根據土地註冊處資料顯示，該層樓面2013年由香港清純發展有限公司以6,600萬元買入，公司董事包括林億峯，去年初取消交易。

其後經拍賣行拍賣仍未賣出。同時又經代理行放盤，去年底曾劈價至5,000萬元，亦乏人問津。等到本月中，才以4,600萬元易手，較撻定價平2,000萬元或30%。
連同今次，該廈已是第二宗撻定賤賣，去年底該廈21樓全層，面積一樣，處境相同，曾經撻定，之後以4,350萬元成交，呎價1.98萬元，較撻定價5,060萬元，賣平710萬元或14%。
該廈勢成蟹貨重災區，事關大廈25層樓面，現有約15層樓面放售，當中超過一半求平手離場，部份甚至蝕住放，例如一個中層全層，樓面約2,200方呎，叫價4,800萬元，較買入平約11%，賬面勁蝕590萬元。
禍不單行，價跌租亦跌，大廈21樓，全層面積2,200方呎，剛以6.7萬元租出，呎租30元，創入伙呎租新低。出租率近四成，租客主要為食肆，成交呎租由35元至逾50元，現時放租樓面約兩層，叫租由8萬元至10萬元，呎租36元至45元。

資深投資者「物流張」張順宜持該廈高層全層，現以11萬元租予發展商作為示範單位。他接受訪問時表示：「𠵱家個市係咁㗎啦，唔好話樓上舖，彌敦道地舖都係咁啦！最差嘅時候都已經嚟咗！咪收下租先囉，租客好。」
對於市場不乏蝕讓，他稱：「要賣，梗係要平先有人買，對比高位自然有回落。可能願意蝕讓的人唔想再揸啩。」但他強調暫無意出售該樓上舖，「賣咗都未必有嘢買，後市未至於咁悲觀」。