西班牙女星彭妮露古絲（PenelopeCruz）最近為內衣品牌AgentProvocateur所設計嘅L'Agent系列內衣擔當導演拍嘅微電影，今日有得睇喇！雖然彭妮露冇份出鏡，但係佢為咗表現唔同類型女性嘅美態，搵咗好多女模特兒演出，親自指點model扮甫士，仲搵埋佢之前大緊肚嘅妹妹MónicaCruz客串。

呢個6分鐘嘅短片簡直係滿足晒所有男士嘅幻想，故事講述男主角去到一個HouseParty，戴上L'Agent黑超之後，竟然有透視功能，睇晒女士們所穿嘅內衣，令到呢位男主角好震驚！之後仲遇到個美女為佢跳辣身舞，原來就係球星C朗女友IrinaShayk，真係索到爆，難怪男主角頂唔順係咁流汗，之後仲暈咗。

結果醒番時見到個大叔，係彭妮露嘅老公積維爾巴頓（JavierBardem）扮演嘅地盤工人，叫男主角咪再發夢，快啲手開工。真係夢想幻滅喇！