韓國電影近日喺本土吐氣揚眉，多部韓片都成功打低荷李活電影得到好票房，好似《復國者聯盟》同《燥底師兄生擒富二代》都有好好嘅成績，兩部電影都錄得逾千萬觀眾入場欣賞。

而今年6月喺韓國上映嘅《延坪海戰》同樣深受觀眾歡迎，雖然票房就唔及《復國者聯盟》同《燥底師兄生擒富二代》，但同樣有理想嘅票房，不過近日《延坪海戰》就繼《復國者聯盟》之後再度陷入抄襲風波。

根據韓國知名作家朴哲洙指電影《延坪海戰》中嘅一部份場景涉嫌抄襲咗佢發表嘅小說，而朴哲洙方面亦都向首爾中央地方法院提出訴訟，要求電影嘅製作公司和導演金煥松賠償100韓圜（約0.65港元）嘅費用。

對於今次訴訟，朴哲洙就話：「雖然抄襲嘅部份喺片中佔據微不足道嘅份量，但即使抄襲好少嘅一部分，我認為都係讓人無法忍受，因此向法院提起相關訴訟。」而《延坪海戰》導演金煥松就否認抄襲，又話：「我哋喺拍攝該片之前，並睇過朴哲洙寫嘅小說。而原著小說《延坪海戰》於2007年發佈，喺電影中嘅添加劇情等版權問題已於2009年進行登記，而朴哲洙所寫小說發表於2010年，話我哋抄襲純屬無稽之談。我哋會以法律手段給予對應。」