當年今日
關於我們

波叔思念會|親力親為建物業王國 近年拋售逾百億物業救子

蘋果日報 2021/06/05 03:19


舖王鄧成波(波叔)縱橫工商舖市數十載,高峯期曾擁有逾200項物業,惟一場金融風暴將其買舖上市夢化為烏有,曾經風光一時的舖王頓變負債纍纍;及後隨着市道轉好,舖王亦成功捲土重來。與其相熟的地產代理表示,波叔以往入市一向「快、準」,亦會親力親為「睇貨」,造就其數百億物業王國。
波叔於市場打滾多年,買入物業多不勝數,今年更憑47.5億美元(約370.5億港元)身家擠身福布斯中國香港富豪榜第19位。與其相識近30年、不願具名的地產代理指,波叔為人友善,更待代理如朋友般,「我入行第一個電話就係打畀佢......佢份人好友善,基本上只要你開聲,件貨佢又啱心水,佢都會盡量幫你買;多數舖位佢都會自己親身落去睇......佢落決定出名快,出個價都好貼市,眼光好準。」
據代理統計,波叔於2017至2019年間,大手掃入工商物業、酒店、舊樓等多項物業,涉資逾266億元,當中最貴重莫過於2017年2月時斥23億元,向恒地(012)購入觀塘麗東酒店,及後易名作悦品海景酒店 ‧ 觀塘,總樓面約23.53萬方呎,提供598個酒店房間,即平均每個房價385萬元;其次則為荃灣汀蘭居全幢,總面積約21.6萬方呎,共有438間客房,波叔同樣於2017年以16.8億元買入,平均每個房間造價約384萬元。
直至近年,波叔把業務交由兒子鄧耀昇打理,藉此支持其發展酒店、護老院等事業;惟多次傳出財困消息,並有指波叔大幅拋售物業、「撲水」救子,其中單計去年全年已連推價值逾102億元貨於市場放售。
受訪地產代理慨嘆,波叔近年入市「過於進取」,「5、6年之前佢入市係好準,後尾可能年紀大,有啲又為咗佢個仔(鄧耀昇)去買,變咗出價都有啲偏離咗市場。」事實上,波叔更不惜蝕沽物業套現,包括今年初以4億元售出西貢花園地下入口及1樓舖,面積約28,439方呎,較其2017年市傳買入價4.38億元,蝕3,800萬元或約9%離場。
對於波叔上月中驟逝,該名地產代理坦言,「真係好唔捨得佢,同佢嘅關係已經唔係經紀同客......我成日都同佢講『我已經當咗你係細叔伯』;同佢個仔冇可能好似波叔咁,處事手法同對人都好唔同。」
事實上,自波叔辭世後,市場即流傳一份鄧氏家族待售物業表,並列有39項物業及「即簽即賣」價錢,當中標價較高的物業包括油麻地窩打老道40號寶翠大樓、即婚禮統籌公司拉斐特(Lafayette Wedding)舊址,即簽價高見3.38億元,以項目總面積約2萬方呎計,呎價約1.69萬元。
-----------------------------
蘋果App大升級 更簡潔更就手!了解更多立即下載體驗
-----------------------------
一書盡覽新手必讀資訊
-----------------------------
【全球樓行】 Dream House零距離
屬於香港人的移民攻略