【新增動新聞】
前英格蘭隊長朗尼醉駕出事雖然已經判咗社會服務令，但佢疑似偷食單野就仲未拆得掂，而英國《鏡報》就話老婆高蓮下咗最後通碟，要求老公快啲同損友布朗（Wes Brown）絕交。高蓮認為布朗帶壞朗尼，事關佢地兩個的確好老友，5月嗰陣更畀人影到一齊去賭場賭錢，朗尼即日就輸咗50萬鎊（約500萬港元）。唔單止係咁，朗尼出事之前就係去咗酒吧同布朗劈酒，件事搞到高蓮好嬲。查實朗尼臭史一向多籮籮，爛滾爛飲爛賭乜都齊，高蓮又唔好乜都入晒布朗數。