無綫J2台今晚接棒亞視播出六合彩，《蘋果》噚日搶先揭盅，取代六合彩之子蔡國威做主持嘅，係由馬會自行委派賽馬前主持兼舞台劇演員蔡運華(Shirley)，今晚順利開彩。

問蔡國威BB覺得蔡運華表現成點？佢話:「幾好，流暢，模式同我主持一模一樣，如果100分滿分，我就畀佢有90分以上，佢本身都好有主持經驗，又係演員，當然無懈可擊。扣咗佢啲分，係想佢繼續有進步空間。」

蔡國威BB話，希望蔡運華同佢個名一樣，為巿民帶嚟好運，蔡國威又對同姓三分親嘅蔡運華讚不絕口：「姓蔡嘅果然係叻啲，我撐佢㗎！」

有指蔡運華被揀咗接棒主持六合彩開彩後，馬會安排咗蔡國威任導師、傳授其實戰經驗，對此蔡國威話：「大家sharing。」