吳博君曾為無綫效力19年，在多部劇集擔任「綠葉」角色，包括：《上海灘》、《獵鷹》、《笑傲江湖》等，在《天龍八部》扮演「風波惡」，還包括早前重播《刑事偵緝檔案2》、扮鹹濕佬偷睇鄭秀文沖涼。

吳博君說：「因為嗰時又識打又識做戲嘅人唔多，變咗做開壞人，就成日做壞人。我學過洪拳、少林拳，做壞人做飛仔，比較難忘角色同呂頌賢做《笑傲江湖》，嗰個唔係壞人角色，係桃谷四仙，角色幾好玩。」

吳博君最深刻一部劇，就是劉德華做主角的古裝劇《魔域桃源》，他說：「有場戲我喺二樓跳落嚟，唔係人人肯做，我都試過。」

雖然肯賣命演出，但最後卻是被請食「無情雞」，說起此事，他很淡然：「97年金融風暴離開無綫，嗰時裁員裁得好犀利，全香港好多人都冇嘢做，佢哋cut人cut得好犀利。我都要搵食㗎！」咁點生活？「之後做過整麵包、紙紥舖、出版社，如是者做咗好多行，完全同電視台脫離任何關係，同圈中人都冇聯絡。」

回顧在電視圈的日子，吳博君百般滋味在心頭：「我本身喺娛樂圈見過嘅嘢唔少，有啲人為咗達到某啲嘢，乜嘢手段都做得出，我覺得好唔舒服，所以有感而發講咗句：『數十年見盡人間醜陋！』好似踩住人上，呢啲情況見唔少，其實任何一間大機構都出現好多人事鬥爭，唔止娛樂圈。」

問到想唔想再拍劇？博君坦言：「有人問過我，麻麻地，一嚟自己年紀唔細（61歲），二嚟拍電視劇好辛苦，我又覺得唔值得，又唔係冇飯食。」

精選娛聞，喺晒《娛果》
http://fb.com/appledailyent