有民建聯立法會議員蔣麗芸嘅地方，真係唔怕有悶場！繼倡議成立貓隻滅鼠隊，同九西有鼠王芬之稱嘅經民聯梁美芬隔空過招搶風頭之後，元秋又有新猶，呢次唔關地區衞生問題，卻連他人嘅飲水習慣都關注埋。個post出咗之後，「暴龍哥」鄭中基都有轉載相關新聞，仲講咗句「出半份糧俾你已經很浪費」，唉，真係講中唔少香港人心聲呀！

元秋今日喺Facebook上載一張叉腰手指指眼神凌厲並有大嘥鬼同佢一齊嘅圖，寫明「議員只准飲半杯水」，咩事咁專制連一杯水都唔畀飲？元秋自行解謎，佢話大家成日話要珍惜食水，但有啲議員卻係大嘥鬼，指立法會每次開會都為議員添滿成杯水，但好多時都冇飲完、非常浪費，佢特別為此去信立法會行管會，建議每次限添水半杯，引述行管會從善如流，回覆話會提醒管事添水時嘅份量！

哦，原來連添水問題都成功爭取，難怪要喺Facebook公告有幾「威水」，但有網民卻好醒水，發現元秋日前開會時用紙杯飲水，質疑佢唔應該就此抽水，唔知元秋會否就此反擊再噴口水？