一位讀者Sophia話想捐款畀兩個組織，問支票寄去邊度。好易啫，你講嗰兩個單位都在中大校內，寫完支票，可以寄去（一）新界沙田香港中文大學中醫中藥研究所梁秉中教授收，支票抬頭人係「香港中文大學」，可以喺支票背後寫明：捐款予中大中醫中藥研究所，最好同時附上回郵地址，以便佢哋寄回捐款收條；（二）寄去中大畀中大校友事務處主任俞靄敏女士收，抬頭人同樣係「香港中文大學」，支票背後寫「捐款予齊關心WeCare基金」。
讀者Eric問目前係地產發展顧問，想話讀MBA，申請中大或科大，約二十萬一年，是否值得。Eric，呢樣嘢係要認清楚將來嘅職業取向，是否博呢一鋪，冇人夠膽講。五月六日報紙新聞講哈佛耶魯今年嘅MBA畢業生，好驚搵唔到工，呢班美國精英，入學前人人有工做，薪水有番咁上下，點知用咗十二萬幾美元讀完兩年，竟然面臨失業威脅，你話幾慘？一位哥倫比亞大學MBA重話考慮做住酒吧酒保先，叫做賺番份人工，想落都幾淒涼。
現在世事難測，讀MBA都要冒兩年風險，機會成本甚大。公關小YY辭咗份工去瑞士讀酒店管理（本欄以前講過），當時係二月，酒店生意初初話好好，小YY充滿信心。點知去咗一個月之後，香港就爆發沙士，遊客唔嚟，酒店房間十室九空，小YY想話返嚟做見習，冇酒店肯制！一個月啫，世界已經唔同晒，所以左丁山唔敢向Eric畀意見，請自行慎重考慮。