黃家駒離開了25年。25年，即四分一世紀，足夠一代人（90後）出生、學行、讀書、工作，成家。

80年代Beyond成立，經歷多次成員變動，到85年黃家駒與黃家強、葉世榮及黃貫中組成核心樂隊，一步步走出一片海闊天空，譜出段段光輝歲月。

可惜樂隊事業如日方中之際，靈魂人物黃家駒，在日本拍節目時意外從高台墮下，不幸離世，終年31歲。

家駒離開了25年，90年代曾替Beyond做助手的龔建忠（阿龔），家駒生前戲稱為「開心巨人」，這天細說家駒那些年舊日的足迹，聽著他講家駒：「佢好鍾意同人傾偈，嗰陣佢同單立文、雷宇揚好老友，無聊嘢又傾、工作嘅嘢又傾。有時喺酒吧傾到凌晨5、6點，行內人有句說話形容佢，家和萬事興，家駒口不停。」

回首往事，看着家駒將結他緊抱的舊照，聲沙沙的獨特聲帶變得立體：「這個世界已不知不覺的空虛 Woo......不想你別去。」

時間倒流到25年前某一天，我們且跟家駒走一轉。

導賞團導遊：
助手阿龔（龔建忠）、黃家強

＊　＊　＊　＊
「我要再次找那 舊日的足跡
再次找我過去 似夢幻歲月
腦裡一片綠油油 依稀想起她
心中只想再一數 那舊日故事」

【出發：蘇屋邨茶花樓】
屋邨長大的家駒，以前跟家人同住蘇屋邨茶花樓（已拆），生活簡單，同所有屋邨長大嘅小朋友一樣，冇嘢做就落街玩，走嚟走去。

家駒做過製衣廠嘅布料買手、又在世榮介紹下做過保險經紀。入行後，家駒作息開始不定時，但放工返屋企，通常都會路經附近的鐵皮屋。

跟阿龔來到蘇屋邨，拆得九九十十，附近街市的鐵皮屋檔口當然冇晒。阿龔沿路說：「以前車家駒返工放工，經過啲鐵皮屋，佢都會喺度買嘢食。好記得有一個糖水檔，買渣喳，佢每次經過都話要買碗。」

經常見到家駒身上好多飾物、算是一個貪靚嘅人，阿龔笑言家駒屋企有好多私伙飾物，耳環戒指頸鏈一大堆：「如果大家有細心留意呢，佢個人係好姿整嘅。好多時你睇見佢影唱片封面呀雜誌呀，戴好多手鏈呀頸鏈呀戒指呀，佢會喺屋企臨出門口襯一大輪揀一大輪先出嚟。佢出門口呢一個環節都幾『立懦』。」

／／家強：「我哋兩兄弟喺度長大，屋邨有個山頭，成日上去煨蕃薯、捉草蜢，仲去水塘游水，其實都幾危險，但呢啲係唔使錢嘅娛樂，有好多回憶。」／／

【第二站：廣播道五台山】
排山倒海的工作，Beyond好多時候在廣播道出現、商台、港台、電視台幾邊走，顛倒日夜不斷做，家駒都沒埋怨，阿龔話：「佢哋會有幾個月時間閉關做歌，做好晒喇，開始出嚟做宣傳呢，就會長時間喺晒呢度喇。

「你睇佢哋嘅工作真係密到令人驚訝，我屋企人都覺得，點解你一年365日都可以唔喺屋企、你可唔可以顧家少少？但個行程表出嚟，先至信原來一個藝人嘅工作可以咁多。

「當時好得意㗎，佢哋四個，加埋我五個，一架車出去，周圍去，一個人孭三支結他四個袋。有個電視台節目，每個禮拜都喺廣播道總台化妝間集合，化妝錄影。佢哋又唔係好介意（辛苦），可能當時大家都好後生，所以開工嘅時候都好投入。

「唔使埋位嘅時候，家駒多數都係捉住身邊嘅人傾偈，其他啲人可能唞吓、食啲嘢，但佢都係捉住身邊啲人傾偈。演員又傾一大輪，導演呀工作人員呀佢又傾一大輪，呢個可能係佢特性嚟嘅，係人都可以傾一大輪。我諗佢對演藝唔同崗位都真係有好大興趣。

「佢可以講到離題萬丈遠都得，但係你睇見佢又唔係亂咁吹，人哋答佢嘢，佢係一路有反應，吸收緊人哋講嘅嘢。」陳奕迅被譚詠麟冠以「吹神」之名，但講到「元祖級」，非家駒莫屬。

「家駒唯一有少少毛病仔就係，爛瞓少少，要人催起身係辛苦少少，但工作起上嚟嘅態度係絕對冇問題。」

／／家強：「最去得多係TVB、商台同港台，記得嗰時喺TVB化妝間，我哋四個一齊，冇乜理其他藝人，張學友走埋嚟，問我哋成日見，點解仲咁多嘢講？

「可能我哋玩band另類，所以冇乜同其他藝人傾偈，之後耐咗，我哋都有同其他藝人傾偈，冇咁另類，同王菲坐埋一張枱食飯，家駒都有主動走去同其他人傾偈，佢同杜德偉、明哥（黃耀明）好好傾。」／／

【第三站：二樓後座】
位於旺角洗衣街龍源賓館的「二樓後座」，本來是世榮嫲嫲的住所，她離世後，世榮要求家人給他做band房，這裡充滿Beyond的回憶，也是Beyond的大本營，練歌、夾Band、錄Demo等，衣食住行玩，都在這裡，有時錄到三更半夜。

雖然Band房有隔音措施，但不有時有住客投訴擾人清夢，警察經常上門。阿龔笑言：「係有做隔音嘅，但有做好似冇做咁。練就練到三更半夜，差人都經常性上嚟，都慣咗，知道嗰個地方係乜嘢事，『又有人投訴喇，大家執生啦！』大家都明嘅。」

家駒很多時教人彈結他，阿龔指未做Beyond助手前，因為同學跟家駒學結他，自己都會一齊玩：「嗰陣時日日上嚟hea啦。唔使約㗎，自己到時到候就會上嚟坐定定，冇嘢玩就會彈吓結他，傾吓偈。上面有時會塞滿人。好記得有部電視，壞咗好耐㗎，只係得雪花，但係唔知點解又會照開住，大家一齊睇住部電視又好似有嘢睇咁，咁又可以過到一晚。

「上面好得意嘅，好多人、幾十人『質』滿晒喺上面，質到滿，唔知點解都質得落。嗰度叫做有個廳，有個band房，分開幾個地方。裡面夾band，出面就喺度傾偈。有啲人發現咗啲新碟，又會喺度介紹。成班一齊，每一日都見住，一齊玩一齊食飯一齊吸收，去到依家，因為當時一齊喺度玩嘅，依家唔少都喺音樂界做緊，因為當其時跟住佢哋學到嘅嘢，到咗今日真係入咗呢一行。」

／／家強：「最記得由一間細細嘅房，趕走晒啲住客，畀我哋霸晒嘅過程，佢哋投訴我哋夾band嘈，但地方係阿榮嘅，住客有乜理由投訴包租公，雖然係阿榮嫲嫲租落畀住客，當年有好多住客，分租畀一個大家庭，另外仲有單身人士，阿榮攞咗兩個房，一間佢自己瞓，一間畀我哋練歌，畀人投訴時通常我哋冇出聲，由阿榮搞掂，差佬嚟時我哋咪停囉。

「最多回憶係成日一大班人，因為當時收入唔穩定，所以我哋教學生結他，每人都有收學生，學生又帶朋友嚟，後期band房好多人，家駒會話：『不如去紅館空地玩。』大家夜麻麻就走去打排球，因為二樓後座太細。佢好鍾意搞集體活動，好鍾意帶我哋去長沙宿營。」／／

【第四站：尖沙嘴、中環蒲吧】
家駒放工後，會去幾間的士高、酒吧，轉幾次場跟朋友傾偈。由尖沙嘴廣東道Hot Gossip玩到新世界中心的Catwalk，之後會再轉場到中環，包括明星常去的97吧、64吧（俱已結業），最尾一站通常是位於雲咸街的Soho。

阿龔話：「家駒唔會飲好多烈酒、唔會成日飲醉，佢鍾意同人傾偈，嗰陣單立文、雷宇揚嗰啲都係佢朋友，乜都傾得一餐，無聊嘢又傾、工作嘅嘢又傾，朋友嘅事佢都聽，同埋佢有興趣嘅事就會不斷追問。你會感覺到佢好開心。」

阿龔還提到「64吧」：「通常我哋成班朋友開Party呀、聖誕節呀，新年除夕都喺度玩，老闆亦相當好人，所以好多圈中人都鍾意嚟玩嘅。一晚玩到咁上下，嚟埋Soho呢度，差不多已經係天光咁滯。」

點解Soho會係最尾一站？阿龔解釋：「因為佢係開得比較夜，或者話係開得比較早，開到朝頭早差唔多六、七點先閂門，所以好多時成班朋友一齊玩，玩到最後尾，意猶未盡都會嚟呢一間。行內人都知，有句說話形容佢，就係『家和萬事興，家駒口不停』。」

／／家強：「年輕人鍾意去蒲囉，一班朋友去飲酒傾偈，但家駒唔飲酒㗎，只係叫可樂，佢唔鍾意醉嘅感覺，覺得醉咗嘅人好樣衰，所以佢話唔想醉，哈哈哈！」／／

採訪：王連連、余燕儀
攝影、攝錄：郭賢興、林德雄