【新晉視后】聖誕有機會收求婚戒指? 李佳芯:驚同喜只差一線
李佳芯黎諾懿丁子朗張寶兒
啱啱升呢做視后嘅李佳芯今日同黎諾懿、張寶兒、丁子朗喺上水出席聖誕活動,齊齊獻唱兼玩遊戲,吸引大批途人圍觀。
黎諾懿話最近肺炎鏈球菌好勁,所以就冇帶仔仔出去:「噚晚平安夜都係喺屋企過,我親自下廚咋。今日就同3大女神開Party,我約咗以我老婆為首嘅女神,有李佳芯同高海寧,成班《BB來了》嘅朋友聚下。雖然去人哋屋企,但都係我煮嘢食,都係海鮮嗰啲最方便。其實李佳芯攞咗視后,應該慰勞我哋㗎嘛,遲啲先一筆過要佢還。」講到造女大計,黎諾懿話趁住假期搞緊:「我放假放到1月頭,平安夜我哋好唔平安,放心,有好消息同大家講。」
李佳芯話噚晚平安夜,特登同朋友去尖沙嘴食飯:「不過都幾蠢,我喺尖沙嘴個路口塞咗45分鐘,今晚就同黎諾懿佢哋慶祝。」講到黎諾懿話歡迎佢攜眷出席,李佳芯笑謂自己冇「眷」,因為未結婚。咁男友陳炳銓?李佳芯笑言唔知容唔容納到佢:「不過佢哋都啱傾,睇吓佢得唔得閒先,可能佢自己約咗朋友,我好開通㗎!」講到聖誕禮物,佢就話節日唔興送禮,反而平日見到啱就會買。
記者笑言會唔會見到啱嘅求婚戒指?李佳芯話:「佢諗埋啲平日我諗唔到嘅嘢,所以大家諗到嘅佢應該唔會做,佢會做啲意想不到嘅,驚同喜只差一線,笑吓囉。」講到黎諾懿喺台上話等開《BB來了2》,李佳芯話最緊要搵到啱嘅「允豬」演出:「佢先係最重要。」
至於張寶兒就話男友袁偉豪要開工,所以聖誕節慶祝活動都冇預對方,但應該會抽到時間見面,仲好冧咁話:「我哋會送最珍貴嘅嘢畀對方,就係我哋啲時間。」丁子朗透露啱啱去完澳洲旅行返嚟:「喺嗰邊嘅朋友介紹咗另一班朋友畀我識,但都未有時間真正了解。澳洲真係好正,我諗過退休過去長住。」
精選娛聞,喺晒《娛果》
http://fb.com/appledailyent
李佳芯今日同黎諾懿、張寶兒、丁子朗喺上水出席聖誕活動
黎諾懿:「噚晚平安夜都係喺屋企過,我親自下廚咋。」
講到聖誕禮物,李佳芯話節日唔興送禮,反而平日見到啱就會買。
記者笑言會唔會見到啱嘅求婚戒指?李佳芯話:「驚同喜只差一線,笑下囉。」
於張寶兒就話男友袁偉豪要開工,所以聖誕節慶祝活動都冇預對方。