「我哋做網絡其實好虛擬，一個like代表即係有人睇，但我唔會想像到底呢幅畫影響緊幾多人，又有幾多人喺手機睇緊幅畫!」插畫師搵食艱難，專門畫情侶之間嘅插畫或許更難，這對90後情侶於網絡世界公然「放閃」，開頁兩年時間換來18萬粉絲，惟是否代表有「錢途」？

《大大與小妹》畫二人拍拖點滴的窩心淘氣小品，小妹一年前開始全職打理專頁及創作，男友大大負責供應靈感，「想像中的全職好開心，每日好『他調』，喺張床度畫幾張畫；但現實係不停做，由朝到晚。」跟很多網紅一樣，為了保持人氣，小妹盡可能做到每日一圖，現時每幅圖穩定地收到逾千個讚好。

全職後承受創業的壓力、現實的「開飯問題」，不過曾經有人誤解他們略有名氣的插畫師「搵好多」，「睇你點定義『搵得多』，我的收入是較打工時高，因為有時會推出自家設計商品、接到廣告，如果我每星期都有一條廣告，跟住每月出一件產品，我就可以賺到好多錢喇！」不過他們沒有選擇這條路，反而死守instagram平台，目前為止僅僅賣過一則廣告，為小妹前經理人接下，她解釋不想太商業化，大大補充「我哋出圖係無收到錢㗎，一蚊都無。」當插畫家是為闖出自己一片小天地。

畫情侶插畫源自小妹內斂的性格，跟大大拍拖初期，「我以前收埋（感受）唔講，淨係畫畫畀佢睇!」小妹笑言初期的生日、情人節、週年禮物全是手繪本。後來忽發其想創立一個屬於二人的專頁，慢慢積累人氣，亦令他們驚覺情侶之間生活細節如此引起共鳴，更不愁沒有靈感，「每一日都有唔同嘅事發生，唔會無靈感。」開頁第三個月已有編輯邀約出書，現時不定期推出插畫以外的周邊商品，例如手機殼、風車、頸枕、公仔等。

今年他們首次擺年宵，一來與粉絲見面、二來銷售自家商品。「小妹我都好似你咁痴身！」「小妹，你真係唔好再畫咁多肥仔波啦。我依家每日都好困擾！」選擇山旯旮的長沙灣「細場」，而非旺角、維園「大場」排隊人龍仍然絡繹不絕，「旁邊擺檔的公公婆婆都話後生仔你地好叻，帶旺咗個場！」 但粉絲為何會購買這些商品？「他們會幫公仔打扮，帶他們去旅行、影結婚照，因為個公仔同佢地有共通點，粉絲將自己代入去。」

畫插畫畫出名氣，現時小妹全職投入插畫事業，大大戲言「出事喇！把口又唔可以講唔好（全職做插畫）」之後再補上一句，「有咁好嘅機會唔通唔揸住咩？」小妹認為趁年輕應要全情投入，「如果唔係幾年後無乜人睇，已經無呢個機會，倒不如搏一鋪。」

記者︰陳家恩

全球樓行 Dream House零距離
https://hk.feature.appledaily.com/overseasproperty