日本國民級組合SMAP因內訌而決定解散收場，令SMAP過埋今個月將成歷史，雖然五位成員會跟尊尼事務所續約，但除咗木村拓哉之外，其餘四人或於明年滿約後各散東西，SMAP成員目前各自主持嘅節目仍會繼續，不過明年只有木村主持嘅電台節目《木村拓哉的What's up SMAP！》會以原名播出，其餘隊友嘅電台節目都會改名，中居正廣噚晚喺每逢周六晚播出嘅《中居正廣的Some girl' SMAP》內宣佈節目明年起改名叫《中居正廣 ON&ON AIR》，其餘成員節目都無一倖免。

同時，中居喺自己主持嘅電視節目內模仿PIKO太郎大跳《PPAP》舞步，事源佢因為成為節目環節嘅輸家，所以十分唔情願下換上一身PIKO太郎嘅豹紋大叔打扮，中居獲PIKO太郎拍片專人指導，結果中居喺西武巨蛋球場上亦跳得似模似樣，由神情到細節都扮足正版，甚至比正版更加猥瑣及抵死，絕無欺場，獲在場球員熱烈鼓掌，不過當中居跳完後即揼地扮發爛渣話：「想點呀？當我幾多歲？我入咗呢行都28年啦！我可以我使咁委屈自己！」