34D咪神張秀文今日喺灣仔出席動漫電玩節記者會，講到佢日前被本報喺銅鑼灣同前經理人Victor拍拖，佢哋搭自動電梯上商場嗰陣，男方情不自禁咁深情一攬，全程畀本報直擊。（新聞連結： http://bit.ly/290wILh 　）

查實當日佢哋係急步上到去商場，張秀文即刻黑面兼用背脊對住鏡頭，今日問番佢呢件事，佢唔認兼竟然話：「本身我真係等lift上樓上，但係咁啱我擰轉面望緊街，因為我想買雜誌換頸枕，我嗰日出街已經買晒，一望見到樓下有報紙檔，咪喺度昅緊，點知feel到後面有閃燈，咪輕輕向後望一望囉！我冇化妝，咪有啲驚！」但係商場同樓下嘅報紙檔有一段距離，如果佢喺商場三樓望落去都睇到，真係好好眼力。

死口唔認拍拖嘅張秀文，如果將來拍拖會唔會公開？佢話：「要睇對方，拍拖係雙方面嘅事，除非佢係圈中人，唔係會影響佢嘅生活。」佢亦澄清冇同居：「我哋係鄰居，未去到同居。」至於有冇受到公司壓力，佢話：「公司冇特登去傾叫我低調抑或唔俾拍拖嗰啲，隨緣喇！」