當年今日

EO2面前謝天華榮升叔叔
馮仁昭四圍超:新人SiSi一字馬嚇壞Cookies

蘋果日報 2002/08/07 00:00


謝天華、九人女子組合Cookies、女新人SiSi、E-kids同EO2等,前晚喺無綫電視城為周日(十一日)舉行嘅「2002年度香港小姐競選」排舞。

演百老滙歌舞
眾人將合作表演一幕百老滙歌舞劇,SiSi更施展渾身解數,即席表演一字馬,動作十分敏捷。相反地,Cookies九位成員跟住導師排舞,但大家嘅動作唔係好一致之餘,重有啲雞手鴨腳,不過,Cookies全體成員都好畀心機去練習。
謝天華同EO2嘅成員都係舞蹈員出身,佢哋見到謝天華即尊稱佢「師叔」,謝天華話:「我都係早佢哋一屆,但都事隔成十年。」問謝天華覺得女子組合Cookies一班女仔點樣?佢話:「好『𡃁妹』,佢哋不妨當呢份係暑期工,好過去出面搵,話晒都同人講做過港姐表演嘉賓。」

恬妞靚靚戲假情真
恬妞同靚靚袁詠儀𠵱家喺新加坡拍亞視新劇《法內情2002》外景,戲入面靚靚做恬妞個女,而恬妞個親生女彤彤(右)都有去探班。
恬妞話同靚靚做兩母女,真係培養出母女情,而靚靚亦自誇比彤彤更了解呢個「媽咪」,恬妞重講笑話佢個女心中只有偶像孫燕姿,嚟探班都係為咗見偶像。
胡敏珊熊仔壯膽做DJ
名表TechnoMarine亞洲區總裁胡敏珊噚日以嘉賓主持身份,為新城財經台節目「非常人非常音樂室」錄音,佢出現時拎住一隻白色毛毛熊公仔。
胡敏珊話:「因為我第一次做DJ,心情有啲緊張,所以專登帶埋隻熊公仔嚟攬住。」

周杰倫最怕睇劇本
啱啱嚟完香港宣傳嘅周杰倫,將會繼緋聞女友蔡依林同孫燕姿之後,為台灣節目《周日八點黨》演出一集《偶像誌》。喺劇中周杰倫會扮演一名外星人,重會同人類發生感情,雖然呢套劇只得短短二十分鐘,但已經要花費過百萬嘅製作費,不過最令周杰倫頭痛係要睇熟劇本。

蕭正楠揼本宣傳新碟
蕭正楠首張EP即將面世,佢所屬嘅唱片公司大灑金錢做宣傳,除咗喺海底隧道口、巴士站燈箱同各主要地鐵站貼大型海報之外,重安排佢拍盈科保險同網上行廣告。
喺廣告中,蕭正楠重會大顯身手,做一啲高難度動作場面。

顧瑞英聞林伯黑臉
林百欣三姨太顧瑞英噚日同一個女性朋友路過中環,顧瑞英嘅打扮重好後生㖭,着住條Levis'牛仔褲之餘,重真空唔戴bra。問佢同林伯嘅錢債官司𠵱家搞成點,兩公婆係咪真係要對簿公堂?佢一聽見呢啲問題,就即刻黑臉,加快脚步離去。