坊間流傳過埋9月澳門立法會選舉，澳門中聯辦主任王志民嚟香港做中聯辦主任，現時嘅西環揸FIT人張曉明就返北京接王光亞做港澳辦主任。升呢在望，更加要做好形象工程，特首林鄭月娥責成新班子要多落區聽民意，小明都不甘示弱，喺25日到訪深水埗搵當區「地標」明哥合照，臨別前到此一遊。

中聯辦網頁有報道「張曉明探訪『北河同行』慈善社企」，講佢去深水埗搵社企「北河同行」負責人陳灼明，去到除咗幫襯買杯奶茶，順勢同嗰度嘅義工傾偈，小明話久聞明哥大名，知佢經常免費派飯畀窮人同露宿者，慕名而來。

又會咁橋嘅？小明拜訪之際，撞正明哥牛一，「臨時備了一份生日禮物」送畀對方，就係佢自己寫嘅「為善最樂」字畫嘞！嘩，小明手字好值錢，之前喺民建聯籌款晚宴，有政協用1880萬競投，真係字字值千萬。據聞佢仲以個人名義向「北河慈善基金」捐款，捐咗幾多就冇交喇。

小明同日仲去咗元朗探訪2010年青海玉樹地震中捨己救人嘅香港義工黄福榮家人，向佢哋表達深切慰問。