粵港合作傾咗十幾年，煲呔先同黃華華簽到份「框架協議」。兩地網民就唔同喇，呢頭7.25廣州萬人上街撐廣州話，嗰頭大家已經計劃緊8.1再嚟一場粵港合作掉哪媽，聲稱到時分別喺香港嘅灣仔修頓、廣州嘅人民公園，同步舉行「保護粵語大行動」。

灣仔修頓球場集會

前記者蔡淑芳話，雖然活動唔係佢發起，但眼見大家喺網上討論得咁熱烈，又驚到時警方話唔夠7日通知，所以噚日佢已經用個人名義，向警方入紙申請「不反對通知書」，申請8月1日即係嚟緊嘅星期日，下午兩點喺灣仔修頓球場集會，3點遊行去警察總部，4點去埋政府總部。申請要報埋參加人數，蔡姐係咁意報咗50至200人。
活動主題除咗撐粵語，仲係捍衞本土文化同保育，所以保護西貢大浪西灣都可以係訴求之一。至於點解去警察總部同政府總部，蔡姐話佢哋代表強權，建議大家到時着白衫、綁白絲帶，以向軍政部門和平「示弱」；市民可以自由自發自主，決定參加邊個時段邊個部份，議題活動言論開放，隨意表述。
有網民報稱，前日廣州集會現場，有廣州人話8月1日會嚟香港，所以希望香港人唔係喺網上吹吓水就算。
民間電台「青台」節目總監楊匡話，今次廣州人撐廣州話運動雖然導火線係當地搞亞運、廣州政協提出電視台一啲頻道改用普通話，但其實過去幾年，廣州民間喺保留本土語言文化方面做咗好多嘢，例如當地粵劇界努力恢復傳統；「粵拍粵掂」嘅年輕人拍片去記錄同質疑廣州嘅變化同本土文化被侵蝕，都值得香港人借鏡。

「CCTVB臭名遠播」

香港、廣州同屬嶺南之地，兩地文化交流一向好緊密，例如Beyond嘅《光輝歲月》、《海闊天空》，就成為今次廣州人撐廣州話運動嘅人民之歌。連香港傳媒嘅情況，廣州人都好清楚，噚日喺YouTube就有段片《二零一零年七月廿五日廣州萬人撐廣州話，CCTVB臭名遠播及廣東人排外心態》，片中廣州人同似乎係香港人嘅同胞討論CCTVB嘅「事事旦旦」，又有人不滿CCTVB報道只有「千人」集會，鞭辟入裏。

mailto:[email protected]