男神變身踎監闊少
王宗堯被挾入暗角打鑊
男神王宗堯及張建聲主演監獄為題材的電影《壹獄壹世界.高登闊少踎監日記》,該片改編自網絡小說《壹獄壹世界》,並將於下月28日上映。電影預告片昨晚上載YouTube,片長一分多鐘,但並非以王宗堯全裸做賣點,反而大玩高登潮語,最抵死是玩埋去年佔中時金句「暗角打鑊」,扮監犯的黃光亮還指揮許家傑將王宗堯帶到牆角打鑊金,笑點是黃光亮把金句繙譯成under the shade。
王宗堯(右)被許家傑挾去暗角打,樣子驚恐。
互聯網圖片
預告片用了大量高登潮語作為介紹劇情,大玩噱頭,當中還交代了監犯生涯,只要有煙仔就可以獄中享特權,例如兩包煙有人揼骨半時連代支、5包煙則有人代為鋪床摺被一個月、10包煙就可以豪擦一餐踎監盛宴。監犯更自製「肥妹仔」解決生理需要。
劇情交代王宗堯這位闊少犯事入冊,獄中生活當然不好受,更得罪獄中大佬黃光亮要捱打,王宗堯昨在電話中說:「獄中規矩唔可光明磊落被打,所以有暗角打鑊。」王宗堯坐監都坐得嘆,他恃着有錢買煙大晒,他笑言拍攝監獄戲學了不少獄中術語,他說:「大家知唔知乜嘢叫『扇把』?即係廁所。」
黃光亮將大熱金句「暗角打鑊」譯成英文,夠潮又搞笑。
至於「肥妹仔」呢?王宗堯說:「係一種飛機杯,用熱水入袋,變成暖笠笠嘅肥妹仔。」他自爆拍攝時更玩爆肥妹仔,被問到是否很享受這一幕,他說:「拍戲時,好多嘢唔會嚟真,只係要個視覺效果,啲水拍得嚟都凍晒,所以唔會好爽,只係交代到劇情。」王宗堯推介高登仔必看《壹》片:「個個人都要睇,而高登仔更必要睇,電影裏邊好多高登潮語同文化,好多笑位,算係笑中有淚。」
採訪:楊定