青春劇《漢娜的遺言》（13 Reasons Why）爆紅，連帶女主角澳洲新星嘉芙蓮蘭科（Katherine Langford）亦被熱捧，佢更憑此劇獲金球獎提名，啱啱完成第二季嘅佢，就連同男主角狄倫米奈特（Dylan Minnette）接受訪問，就大爆劇集第二季嘅發展，當中最令觀眾好奇嘅，當然係已死嘅Hannah點樣再出現？

呢套劇講女主角Hannah因朋友對佢嘅種種歧視、欺凌而自殺，但因為第一季已確切講明佢死咗，令大家都覺得好好奇Hannah嘅故事點樣可以再延續。據報導，Hannah嘅出現於第二季將會環繞Jessica，但據嘉芙蓮所講，觀眾將會見到更多關於Hannah自殺後對身邊朋友帶嚟嘅影響：「呢季將會因好多原因而好有趣，會同第一季故事好唔同，我覺得係好事，呢季將會發掘更多其他角色同佢哋嘅經歷，呢樣嘢令我好興奮。雖然故事好傷感，但Hannah死之後，其他人仍然要生活，今季大家就會見到點樣深遠影響到佢身邊嘅人。」

對於Hannah將會第二季將會回歸，嘉芙蓮就話：「你會於第二季見到個好唔同嘅Hannah，我會叫粉絲有定心理準備，唔好當佢係第一季個Hannah。好有趣，我啱啱拍完第二季，我覺得今季對我嚟講係要放開Hannah。」至於第二季之後仲有無第三季？據故事發展嚟睇就相當成疑。

更多娛聞，喺晒《娛果》
http://fb.com/appledailyent