老朋友問候?咪住,唔該彈開少少。身為前國家級官員,呢個成綬三「退休」之後重編埋中英文辭典㖭,咁佢老人家知唔知英文字Privacy係點解?西方社交禮儀所講嘅Appropriateness係乜嘢意思,或者中文嘅「瓜田李下」點解,定係佢心想Friendship呢個字,喺中國,好似「友誼商店」一樣,只不過係一種你有貨賣,我睇啱就買嘅交易?
飛哥事件最大嘅啟示,就係嘢可以亂食,老友唔可以亂認,特別係北面嘅人,佢叫你一聲「老朋友」,你就好小心啲,分分鐘重險過光明正大稱呼媽田做「漢奸」喎。
肥彭問候就冇事
至於呢位成生,希望佢經一塹,長一智,打電話去香港,一開口咪講人老婆,因為共產黨以前俾人「誤解」過專門「共產共妻」。肥彭打電話嚟問候李柱銘,問起佢太太同公子嘅安危,冇人會當肥彭係恐嚇,點解全世界人問候都冇事,獨係一位姓成嘅共產黨員一出聲就咁大鑊?呢個問題,真係好不幸囉,睇嚟胡溫都要由「以家人為本」嘅角度,喺黨內展開一場辯論嘞。
傳真︰2623-9278
電郵︰[email protected]