當年今日
關於我們

【飲食經典】蘇施黃|澳門獨家沙甸魚醬

蘋果日報 2018/12/11 00:11

專欄蘇施黃澳門沙甸魚醬

最羨慕啲學生,一日都話放假。最離譜就是當年我讀大學時,九月開學,十二月中考試,交paper,放假到一月十號八號,二月老馮有個叫skiing week,一放就放兩個星期,去了加拿大四年多,一次都未ski過,因為我怕高,但假又照放!哈!然後四月中又考試,交paper,放暑假,發神經,個暑假成四個多月!!!加上走堂,一年都唔知有冇返六十日學?!

十二月、一月應該係大家最開心的時候,因為望望日曆,紅多過黑!如果大家頭痛有甚麼好去處,我當然提議大家去澳門啦。我姊姊們回來跟爸爸做生日,我們一家九口去澳門玩了三天。我和哥哥、嫂嫂、姊姊都很喜歡玩吃角子老虎,實在很好玩,不過要很有耐性,其中一個姊姊絕對輸一蚊都肉赤的,所以她又去睇表演,又去行街,哥哥又帶她去Wynn的吉祥樹。

我們住MGM,酒店又好,她就在酒店房歎吓,又染頭髮……結果她被我另一個姊姊渡了她升仙。竟然搵了一部我哋大家都認為悶到嘔的機,哈哈,她竟然玩了兩天,贏了八十元!我告訴我司機,我司機話沒可能,上次他去玩,不用五分鐘便輸了一百元。你知嗎?現在的玩吃角子很新穎的,遊戲中有遊戲,線又多,新仔入一百蚊,坐一毫子機,25條線,按一下便兩個半,容乜易輸一百蚊,好嘞,你見咁易輸一百走啦,唔玩嘞!啱晒!賭場就係最鍾意你哋每人五分鐘放低一兩百走人。

除了玩吃角子,我都會去食吓飯。今次介紹的沙甸魚pate是由葡萄牙飛來的,香港、澳門都冇得賣。但在媽閣的海灣餐廳便有得吃,免費的。你一坐下,便serve麵包和這個沙甸魚pate,很好吃,永遠一碟餸都未來,我便食了兩個大麵包。海灣還有非常正的焗豬扒飯、腐乳蟹、蜆、辣腸……澳門,食又平,又好玩,不過最肉赤是船飛,真是非常非常貴。

海灣餐廳
地址︰澳門河邊新街261-A地下
電話︰(853)2896 7878

(原文刊於2009年701期《飲食男女》)

蘇施黃Profile
資深電台人,天生異「口」,除了講嘢叻,食嘢同樣嘴刁,近年開咪、上電視做主持都不離教人食得精,吸引大批粉絲跟佢搵食。

立即免費下載《飲食男女》App : http://onelink.to/etwapp
《飲食男女》網站 : http://etw.hk