日本重磅女星渡邊直美形象搞笑，近年深受觀眾歡迎，令佢成為藝能界最搶手諧星。渡邊直美喺Instagram嘅追隨人數直迫500萬，佢推出針對肥人嘅女性品牌punyus，早前又喺原宿舉行個人展覽「渡邊直美展 Naomi's Party」，共分成8個房間主題，當中有佢嘅照片同服飾公開展覽。

渡邊直美最拿手模仿Lady GaGa及Beyonce等國際天后，其扮嘢片段亦於網上大熱，今日佢宣佈舉行世界性巡迴騷「Naomi Watanabe WORLD TOUR」，下月將於紐約、洛杉磯及台北演出，下年3月至5月更會於日本展開大型tour，好可惜冇香港!!!!!

其實有台灣血統嘅渡邊直美早已打開寶島市場，更吸納一班支持者。

咪睇渡邊直美圓碌碌嘅身形，原來佢都係色狼男星高畑裕太嘅目標之一。高畑裕太上月23日涉強姦被捕，高畑裕太承認見到女事主控制不住慾望，佢曾多次被指對合作女星手多多，幾位青春偶像都被佢奉旨抽水，估唔到連渡邊直美都唔放過，仲對渡邊直美胸部指手劃腳，搞到渡邊直美要用手遮胸，更於鏡頭前指高畑裕太每次都向佢性騷擾添。