當年今日
關於我們

【有咩開心得過攞金馬影后?】為大女入學停工 林嘉欣估學友封帝機率:睇緣份

蘋果日報 2016/10/22 15:29

林嘉欣影帝張學友素食暗色天堂綠在家中

林嘉欣今日喺奧海城出席「綠在家中GIY」素食烹飪比賽,佢話導演老公袁劍偉食咗素4年,而嘉欣自從做咗活動大使之後,發現咗好多素食食譜,不時煮畀老公食,當做驚喜咁送俾老公。
嘉欣嘅老拍檔張學友憑《暗色天堂》角逐今屆金馬獎最佳男主角,問佢睇唔睇好學友再做影帝?嘉欣話:「唔知呀,好多時都睇彩數、睇命,但喺我心目中好希望佢攞,其他候選個個都好叻,無論點都好,佢係我心目中嘅好拍檔、好演員同男神,唔會變。」問嘉欣如果手上有一票,會唔會投畀學友?嘉欣就話:「其他戲都冇睇晒,我好公平嘅,要睇晒先,一切睇緣份。」問到佢冇份入圍會唔會失落?嘉欣話:「唔會,自己好多時做戲好客觀,但睇自己就苛刻啲,仲有好多進步空間。」
嘉欣大女明年就要入小學,最近就忙緊為囡囡面試準備,仲要求公司停工3個月,佢話:「同公司講今日開始至明年1月唔好郁我啲時間,原來o依家入小學真係好難,我報咗5間,睇吓點。」嘉欣仲話有朋友嘅小朋友入咗心儀學校開心到喊,問佢如果囡囡入到首名志願,係咪會開心過攞影后?嘉欣笑笑口話:「到時真係要慶祝吓。」