唔理新樓定舊樓，特色單位都有佢嘅捧場客，樓齡十二年嘅鴨脷洲海怡半島，一個頂層連平台單位，啱啱以一千三百七十萬賣出，呎價超過八千四，比普通單位平均呎價四千二，高出一倍。情況就好似上個月一千萬易手嘅將軍澳蔚藍灣畔頂樓，呎價七千二，有人會覺得唔值，但偏偏有買家對呢類單位情有獨鍾。估唔到十年過外舊樓，可以比全新樓仲高價。
中原海怡半島助理分區經理盧鏡豪話，成交單位係十座頂樓，面積一千六百三十呎，客廳外接五百二十呎平台，成交呎價八千四，創屋苑過去八年新高。原業主喺○四年底以九百六十五萬買入，揸咗十六個月，升值超過四成，勁賺四百萬。

買家本身住海怡千一呎單位，兩個月前已睇中呢個罕有嘅特色盤，可惜嫌業主叫價千四萬太貴，還價到千三萬就放棄，轉移去外區搵樓，睇過薄扶林貝沙灣甚至南區壽臣山分層豪宅，都無間啱心水，兜兜轉轉，到最後都係揀番海怡，為奪心頭好，一次過追價七十萬，終於成功，可見呢類單位嘅吸引力。同類頂層大戶，成個屋苑只有十四個，𠵱家重有兩個放緊盤，叫價千四萬同千五萬。
電郵地址：[email protected]