故事講述年輕農夫，亂打亂撞下獲得一粒神奇仙豆，因而打開通往巨人世界嘅大門；而囚禁多個世紀嘅巨魔，卻想藉此殺落凡間，統治世界！主角為咗國家、人民，以及深愛嘅公主，只好押上生命，與傳說中嘅不敗戰士作正面交鋒，成就傳奇。

愛追求官能刺激嘅朋友，3D藍光版絕對能夠滿足你！全片約120分鐘，從爬上巨魔世界一刻，已經常呈現超立體效果。除一般靜態場面外，例如仙豆極速變成植物天梯、巨魔追殺傑克等人，甚至尾段巨魔以鐵鈎武器攻城一幕，近乎清一色採用主觀視點進行，要感受逼真3D效果，不妨留意！

如此逼真場景，鍾意與否見仁見智！但影音專家Alan卻認為，因戲內有大量主觀拍攝手法，加上立體感特別強烈，當日試睇咗幾幕打鬥場面，特別係伊莎貝被困在籠入面，佢只感到畫面搖來搖去，好Chok！睇耐咗仲有啲暈。另一方面，佢亦覺得整體3D表現唔多平衡，好似暴風雨當晚爬上天梯，黑位非常清楚；但到咗出現日間靜態場景，卻又有走焦情況，整體表現只算不過不失。

如果屋企無3D影音器材肯定有啲可惜！但值得一讚係，該電影營造嘅音響氣氛，效果絕對唔差！藍光版提供DTS-HD MA同埋5.1 Dolby Digital兩種格式，Alan睇完大讚，印象最深刻係黑夜暴雨嗰幕，雨聲夾雜人聲、風聲以及木屋倒塌嘅嘈雜音，好有層次感，至於雨聲更具有強烈包圍感，好真實！故事雖然好童話式，但欠缺廣東話配音，反而提供咗普通話畀你揀，難道又主攻內地市場？

呢隻港版碟珍藏價值只屬一般。Bonus內容有Become a Giant Slayer、Deleted Scenes及Gag Reel三項，當中刪除片段部份欠驚喜，但如果你鍾意睇靚仔男主角，佢嘅蝦碌片段會極多，話唔定女粉絲會好Like。

種型：動作
畫面：2D/3D、1080p、2.4:1
音效：DTS-HD MA、5.1 Dolby Digital
特別收錄：Become a Giant Slayer、Deleted Scenes、Gag Reel

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange