當年今日
關於我們

【短片】【不敢公開拖手】黃耀明:我係gay佬,喺街咁做會有人用粗口鬧我哋

蘋果日報 2016/01/21 06:00

蘋果阿詩hocc黃耀明同志施政報告記招即時平權消除性小眾歧視諮詢小組消除性小眾諮詢小組

阿詩今日同明哥黃耀明以大愛同盟身份,到立法會出席「消除性小眾歧視諮詢小組工作報告」記招。會上阿詩指香港政府冇誠意,浪費港人時間。可覺得政府對性小眾嘅政策係原地踏步?阿詩話:「退緊後添啦,世界都向前行緊,我哋停步,咪即係退後。」明哥笑指香港仲係發展緊嘅小村落:「政府無誠意,只係鍾意做研究,浪費納稅人金錢。」

阿詩仲話「七警」、李波「被失蹤」,政府都係一味拖:「香港人唔係傻嘅,唔會覺得你拖係等於做緊嘢。」

明哥都話,佢同阿詩嘅社交平台,不斷被轟炸:「只要講啲佢哋唔鍾意嘅嘢,就用你嘅性取向去話你,『死男人婆』呀、『屎忽鬼』呀,呢啲好嚴重嘅字眼。政府應該帶頭去示範反歧視。」阿詩透露有朋友因為係性小眾有抑鬱,甚至有自殺傾向:「如果連政府都唔關心,咁我哋可以依靠邊個?」

問兩人平日出街,可有因為性向而遭歧視?明哥坦言喺街真係少,但啲網民喜歡喺網上留侮辱之言:「我哋活到今日係好硬淨嘅人,但好多年輕人會閂咗個fb,甚至會傷害自己。我同伴侶都唔會喺公眾地方拖手、kiss,呢個係恐懼。我係gay佬,佢係女同志,但喺街咁做,會有人用粗口鬧我哋。」

阿詩自嘲入行咁多年都冇喺街拍拖,除咗因為唔想畀記者影到,同性取向都有關係:「我comeout咗啫,對方承唔承受到個壓力呢?社會壓力令我去諗要唔要保護番我嘅伴侶。」

明哥直指社會唔友善,佢仲笑謂:「如果社會友善,一早拖晒出黎、咀晒啦。」兩人並謂立法保障性小眾同同性婚姻應該同步推行:「有啲地方有同性婚姻,但都未去到反歧視,所以應該兩樣一齊推。」

今日喺立法會發聲後,亦都喺facebook講返佢嘅感受:「同志議題在施政報告半隻字不被提及,已經不是原地踏步,根本是在倒退,讓香港落後於世界。被消失的同志,活在香港政府的漠視下,哀哉。我們不接受這個報告,亦不接受性小眾被消失!———《被消失的同志》!」