就嚟母親節，但要做孝順仔女唔係得嗰日做嘅，有時間陪吓爹哋媽咪食飯都已經可以做到乖嘅小朋友。好似賭王何鴻燊三房千金超雲同超蓮咁，日前就被《蘋果》發現佢哋着到靚靚咁陪媽咪、三太陳婉珍去深灣遊艇會食飯，做個乖乖女。

當晚大約7點幾，三太同超雲、超蓮分別坐兩架車由淺水灣大宅出車去深灣遊艇會，三太同超雲坐Benz，同行仲有一名女性助手，至於超蓮則獨自坐7人車出發。

兩車幾乎同時抵達深灣遊艇會，三太甫落車，就有一名推住BB車嘅女子向住佢熱情揮手，原來係熟朋友，超雲同三太立刻向住朋友方向行過去，而喺後方落車嘅超蓮亦前嚟會合，仲輕拍朋友背脊，超雲同嗰位朋友傾咗幾句後，望向門內另一架BB車，然後超雲再「烏」低身撩面前個BB。

三太個助手幫手托起BB車上樓梯，三太三母女跟隨，上樓梯時，見到三太拉住超雲隻手。一行人入到遊艇會大堂，都仲有傾有講，等電梯嗰陣都未停口，好似好耐冇見咁，之後佢哋一行人就齊齊搭電梯上樓食飯。

話時話，超蓮同龍鳳胎細佬猷啟聽日26歲生日，唔知會唔會好似舊年咁，一家人一齊食飯慶祝吓咁呢？