當年今日
關於我們

男高官聽蔡琴聽上癮 - 李八方

蘋果日報 2007/01/25 00:00


憑一曲《恰似你的溫柔》俘虜了萬千台港猛男心嘅台灣實力歌手蔡琴,來港開騷演唱,向來歌喉唔錯嘅經濟發展及勞工局局長葉澍堃,十幾年嚟都為蔡琴着迷,前晚特登去捧場,可惜坐到第六行。葉局長擁有所有蔡琴嘅唱碟,又記得蔡琴曾經喺大專會堂開過小型演唱會,確係忠心fans。
財經事務及庫務局局長馬時亨都係演唱會座上客,但佢就係即食fans,據知未去聽歌之前,肥馬都唔太知蔡琴係乜水,直至前晚聽完就忽然上癮,欲罷不能,搞到要買多場飛encore聽多次先止到癮。
當年第一個引薦蔡琴嚟香港唱歌嘅,原來係嗰時仲未做議員嘅莎姐(周梁淑怡)。莎姐講起蔡琴就讚不絕口,話佢為人豪爽,大家合作非常愉快。