唔單止咁，記者會足足遲咗成粒鐘先開始，成班記者等到頸都長。負責人話係交通延誤所致，蘭西估，梗喺趙生近排公務繁忙，先搞到遲大到。不過，對於馬灣珀麗灣低價開售，趙國雄好有信心咁話：「都知佢哋做邊瓣，點會截唔到胡？」蘭西心諗，今個禮拜就揭盅。
今次長實主攻一批家庭客，所以耗資近億元，炮製一個三層高嘅兒童會所，包括五個主題區，有動有靜。發展商聯同提供益智兼多元化嘅兒童用品公司合作，提供各項設施。例如蘋果電腦、辰衝圖書、Lego代理建偉集團等。𠵱家嘅小朋友真幸福。記者會到尾聲，重搵到班小朋友嚟演奏小提琴同鋼琴，頓時感到，未來主人翁實在值得用心栽培。
海澄廣告做足資料搜集
香港興業噚日朝早十點三，喺新加坡開記者會，公布愉景灣海澄湖畔二段嘅價錢，意向價每方呎3500蚊，比之前一期嘅造價3800至3900蚊低，但就平唔過後來公布開售價嘅新地馬灣珀麗灣，呎價2250蚊。香港興業有冇後悔咁早就公布意向價呢？不過，佢哋可以先「唱高開低」，結果嚟個震撼價應市咪得囉！
另外，海澄湖畔二段𠵱家重搞咗個「買家推薦獎賞」計劃，凡愉景灣住戶成功推薦買家向發展商直接認購單位，可獲得一萬蚊現金大利是。
同時，發展商又拍咗輯「家在愉景灣」電視特輯，主題分別係「赤子童心」、「悠悠二人行」、「翱翔樂家園」同「執子之手」，帶出愉景灣為現代家庭締造理想度假生活模式。
據講發展商特別訪問咗成百五個愉景灣家庭，先至揀到呢四個具代表性嘅家庭。
呢輯電視廣告好快會「出街」，最想睇嘅，唔知係咪啲愉景灣住戶呢？