近月來,恒生指數屢創新高,冇跟開股市嘅朋友可能會覺得一片歌舞昇平。不過,孫柏文相信好多金手指fan屎同我一樣,都對「恒指屢創新高」呢個現象充滿戒心。無他嘅,股市升浪要畀到人信心係一個不折不扣嘅大牛市,最緊要係市場裏面乜股都升,不過睇番我哋特區嘅恒生指數,升來升去都係得嗰幾隻股票帶動恒指創新高。呢啲得幾隻股票帶動嘅升浪,番鬼佬會形容為「poormarketinternals」,即係我哋特區股民叫嘅「虛火」。
不過冇辦法,雖然我一路以來對後市睇得非常淡,幾個月前叫大家賭跌市、買熊證,仲要以身作則同大家一齊喺呢場升浪當中被「殺」(被「殺」方法就係恒指升到熊證嘅「強行回收價」,所以令熊證喺一個遠比入市價低嘅價位被回收),不過因為個市都仲係繼續升,所以今日我都要同大家解釋吓恒指升嘅動力點嚟。
啱啱到同大家講過,恒指近排屢創新高,都係倚靠幾隻股票。而呢幾隻股票當中,升得最漂亮嘅就一定係差唔多有專利權,喺祖國提供流動電話服務嘅941中移動。中移動升得有幾快?快到出現五年難得一見嘅「所有買跌認沽證喺行使價之外」嘅現象。大家可能會問:「點解孫柏文會話呢個現象係五年難得一見?」原因係當孫柏文同老友《利字當頭》一欄總舵主利世民兄講起呢個現象嘅時候,佢話上一次出現呢個情況,係千禧年嘅1186盈科數碼動力。
大家可能會再問:「嘩!今次中移動唔會學千禧年嘅盈科嗎?」要答中移動會唔會大跌呢個問題,首先要知道中移動點解會升得咁快。大家要謹記,今次中移動大升浪係靠熱錢湧入。你話佢哋係大鱷好,對沖基金又好,今期全球熱錢確實最鍾意炒祖國重磅股「ChinaLargeCap」。而最好就係嗰啲可以受惠於祖國經濟持續急速增長嘅公司。因為花旗國樓市爆煲,世界經濟火車頭地位就會係祖國飾演,就連經濟學人雜誌《TheEconomist》都係咁講嘅時候,仲唔炒起ChinaLargeCap?
大家可能會加問:「孫柏文好成功解釋咗點解中移動升到60幾蚊,不過好似冇解釋點解仲可以升到70、80蚊喎?」去到呢度,我就要同大家分享一段對答,係我同一個喺對沖基金做嘢嘅舊同學對話。當時同佢傾,就係喺05年初,佢好出力咁叫我買Google,我又好出力咁叫佢買白銀。大家都知道我會點樣叫佢買白銀,所以我唔重複,今日就同大家分享佢點樣叫我買Google。
當時Google仲係200蚊一股,佢話只要Google每年盈利增長有50%,市場就可以接受PE50嘅市盈率,所以如果市盈率唔變,盈利又升50%,股價就可以隨着盈利增幅升50%,好快去到300蚊。跟住如果Google令到市場覺得盈利增長可以維持有50%,市場就會開始用來年估計會上升50%嘅盈利做基礎,再乘50倍市盈率,即係將股價由300蚊進一步推到去450蚊。當時我問:「就係咁簡單?」佢話千祈唔好高估對沖基金,佢哋就係咁簡單決定炒啲乜。結果Google真係喺05年由200蚊升到上450蚊一股。
用同一條方程式,中移動令人相信可以每年盈利增長有20%,所以可以接受PE20倍嘅市盈率。如果市場開始憧憬中移動可以喺06年賺$3.25(多05年20%),跟住喺07年賺$3.9甚至$4,到時再乘20倍市盈率,中移動就會被推到去80蚊一股。大家最後可能會問:「就係咁簡單?」有時,炒嘢就係咁簡單。