隔牆有耳:候任一哥指瑪麗落後 - 李八方

蘋果日報 2010/03/18 06:00


「瑪麗醫院雖然係教學醫院,有好勁嘅教授,但係啲設施就追唔上先進嘅醫院。」呢句嘢唔係我八方講,係瑪麗候任一哥陸志聰講嘅。佢話瑪麗落成幾十年,位處山邊,仲有兩座歷史建築要保育唔拆得,所以要重建一啲都唔簡單,佢想上任後逐步改善設施。
聯合醫院行政總監陸志聰做多八日,就會去哈佛進修,兩個月後去瑪麗返工;佢臨飛嗰日仲會去浩園拜祭兩位因沙士去世嘅員工。佢話瑪麗醫院係舊式設計,設施冇辦法追得上新醫院,好似手術室分散各層,唔方便醫生做手術,不過暫時都未有重建時間表,十年八年都未必搞得成。
雖然佢仲未返新工,但佢已經耳聽八方周圍收風,由教授至前線護士嘅料都收,佢話瑪麗嘅問題由朝早搭唔到車返工,至飯堂冇位坐都有,至於醫生工會主席係港大教授,怕唔怕好難搞?佢話一定會同工會保持溝通。