天業節水（840）跌到近08金融海嘯低位，抵博。天業2012年半年度（6月底止）純利得700萬銀人仔，兼倒退超過五成，老實講，業績一啲都唔吸引。但要咁睇，呢期市場逐個板塊輪住炒阿爺嘅新刺激政策。天業主打節水項目，呢個瓣數，一路都有阿爺環保國策所支持，所以，斷估有新經濟措施投入，節水及水利板塊，應該係阿爺選擇。又天業現價跌到得番0.7元，貼近08年金融海嘯價，相對NAV 1.68元，折讓近60%。喺節水板塊當中，相信無邊家公司，夠天業折讓咁吸引。再講，天業對口單位，又係新農八師國有資產管理委員會，後台夠硬淨。呢轉博資金埋身，冷灶煲一煲，博天業升三成到0.9元，股價仲未有耐上到NAV。

保利達資產勁靚

花旗國QE3一出，低息環境繼續，磚頭股炒到飛起，保利達（208）好冷靜咁，仲喺半年橫行底，超級大落後。而集團呢個低殘價（0.73元）嘅NAV折讓貼近70%，吸引到痹。再講，集團呢個折讓水位，仲未計濠江幾幅超靚地皮中線價值反映。短炒保利達，博折讓收窄到60%，要見0.94元，潛在回報率28%。錢雋